Æрæджы, Уæрæсейаг телеканал НТВ-йы райдыдта сывæллæтты вокалон шоу «Ты супер». Ацы проект арæзт æрцыд æппæтду-неон радио æмæ информацион портал Sputnik æмæ телеканал НТВ-йы хъæппæрисæй. Уымæн йæ сæйраг нысан уыд сидзæр æмæ æвæгæсæг сабитæн фадат радтын сæ вокалон курдиат райхалынæн. Проекты хайад райстой раздæры Советон Цæдисы тыгъдады республикæты сидзæр æмæ æвæгæсæг сывæллæтты хæдзæрттæ æмæ скъола — интернатты хъомылгæнинæгтæ 7 азæй 18 азы кары онг, æдæппæт 800-йæ фылдæр сабийы. Уыдон конкурсмæ хуынд æрцыдысты информацион портал Sputnik-ы фæлгæтты комкоммæ эфиры руаджы кастинг ауадзыны фæстиуæгæн. Конкурсмæ хуынд æрцæуæг сабиты фæндаджы æмæ Мæскуыйы дæргъвæтин рæстæджы уæвыны финансон хæрдзтæ йæхимæ райста телеканал НТВ.
Нæ республикæйæ ацы конкурсы хайад райста Цхинвалы скъола-интернаты хъомыл-гæнинаг 10-æм къласы ахуырдзау Гæбæраты Аринæ. Аринæ, конкурсы хайад райсыны фæстæ, нымад æрцыд æппæты рæсугъддæр хайадисæгыл, фæлæ хъыгагæн, нæ бахауд финалон хаймæ æмæ февралы мæйы фæстæмæ æрыздæхт Цхинвалмæ.
Проект йæ куыст адарддæр кодта æмæ ныр бахæццæ ис финалон хаймæ. Финалон конкурс уагъд цæудзæн 27-æм майы Мæскуыйы, Кремлы. Уырдæм, проекты нывæстмæ гæсгæ, хуынд æрцыдысты конкурсы хайадисджытæ се ‘ппæт дæр æмæ ныртæккæ нæ рес-публикæйы чысыл минæвар Гæбæраты Аринæ æмæ йæ хъомылгæнæг Харебаты Маринæ дæр сты уым.
Интернет ресурсты бастдзинады фæлгæтты нын Маринæ куыд радзырдта, афтæмæй, уыдон фæнд кæнынц 29-æм майы нæ республикæмæ шоу «Ты супер»-ы хайадисджыты иу къорды нæ республикæмæ æрхонын.
«Ацы фарсты фæдыл æз бахатыдтæн нæ республикæйы къухдариуæгад æмæ Ахуырады министрадмæ æмæ сын загътон мæ хъуыды. Кæй зæгъын æй хъæуы, уыдон сразы сты æмæ æрбалæууыдысты нæ фарсмæ. Президент Бибылты Анатоли нын рахицæн кодта æхцайы фæрæзтæ æмæ конкурсы финалы фæстæ, 29-æм майы мах немæ акæндзыстæм конкурсы хайадисджыты иу къорд 9 сабийы скондæй. Уыдон хайад райсдзысты 1-æм июны Сывæллæтты хъахъхъæныны боны цытæн нæ горæты уагъдцæуæг мадзæлтты. Афтæ ма фæнд кæнæм уазæг сабиты нæ республикæйы фенддаг бынæттимæ базонгæ кæнын» — радзырдта Харебаты Маринæ.
Хуыгаты М.
↑ Наверх
