Тыбылты Алыксандры номыл Хуссар Ирыстоны паддзахадон университеты райдыдтой бацæуæн фæлварæнтæ. Райсомæй раджы абитуриенттæ сæ ныййарджытимæ иумæ æрæмбырд сты уæлдæр ахуыргæнæндоны кæрты æмæ æнхъæлмæ кæсынц фæлварæнты райдайæнмæ. ХИПУ-йы исæн къамисы бæрнон нымæрдар Намшуридзе Генриетта «Рес»-ы корреспондентæн куыд фехъусын кодта, афтæмæй боны хайадмæ 17 июлы райдыдтой фæлварæнтæ.

«15 июлы онг боны хайадмæ документтæ истам педагогон факультеттæй дарддæр алы дæсныйадмæ дæр. Райгонд стæм, бирæ абитуриенттæ нæм кæй æрбацыд, уый сæраппонд», —  радзырдта бæрнон нымæрдар.

Йæ ныхæстæм гæсгæ, бирæ сты, юристы, экономисты, психолоджы, аразæджы дæсныйæдтæ райсын кæй фæнды, уыдон. Бирæ куырдиæттæ ис ахуыргæнæджы дæсныйады хицæн факультеттæм дæр, ахæмтæм, куыд «Фæсарæйнаг æвзаджы», «Истори, дунеон ахастыты историйы» æмæ æндæр факультеттæм.

«Контингент фæфылдæр кæныны тыххæй документтæ исыны æмгъуыд фæфылдæр кодтам филологийы факультеттæн, биологи, афтæ ма журналистикæйы факультетмæ æмæ æндæртæм. Кæй фæнды, уыдонæн сæ бон у сæ документтæ æрбахæссой», — бамбарын кодта Намшуридзе.

Паддзахадон университеты ирон филологийы факультеты декан Тыбылты Ингæ куыд радзырдта, афтæмæй студентты нымæц æрвыл аз дæр вæййы стабилон.

«Куыд фарон, афтæ ацы аз дæр махмæ ис, ирон æвзаджы, уырыссаг æвзаджы æмæ литературæйы дæсныйад райсын кæй фæнды, аст ахæм абитуриенты. мФыццаг фæлварæн у изложенийæ. Ныфс нæ ис, æмæ уыдон хорз фæстиуджытæ кæй фенын кæндзысты», — загъта Тыбылты Ингæ.

ХИПУ-йы историон-филологон факультеты декан Тадтаты Таймураз банысан кодта, зæгъгæ, райгонд у, юриспруденци æмæ историимæ сæ цард сбæттынвæнд чи кæны, уыцы абитуриенттæй.

«Æндæр факультеттæй хъауджыдæр историон-юридикон факультетмæ фылдæр куырдиæттæ ис, æмæ мæнæн уый, куыд декан, афтæ æхсызгон у. Абитуриентты ‘хсæн ис цæгатирыстойнаг скъолаты рауагъдонтæ дæр», — банысан кодта декан.

Сæ равзаргæ профессийы тыххæй сæ хъуыдытæ загътой абитуриенттæ сæхæдæг дæр.

Гаглойты Ритæ цæуы юриспруденцийы факультетмæ. Уый скъолайы дæр гуманитарон предметтæ фылдæр уарзта.

«Мæнæн æхсызгон у, æмбæстæгты бартæ æмæ сæрибардзинæдтæ кæй ахуыр кæн-дзыстæм, уый. Ныфс мæ ис, æмæ фидæны суыдзынæн адвокат», — радзырдта Гаглойты Ритæ.

Икъаты Зауыр æрцыд Цæгат Ирыстонæй æмæ аскъуыддзаг кодта «Истори. Дунеон ахастыты истори»-йы факультетмæ бацæуын, афтæ ма фæнд кæны Цæгат Ирыстоны паддзахадон университеты фæсаууонмæ социологийы дæсныйад райсын дæр.

«Дунеон ахастыты дæсныйад цымыдисон здæхт у, уыимæ иумæ ма æз ахуыр кæндзынæн социологийы бындуртæ Цæгат Ирыстоны паддзахадон университеты. Уырны мæ, Хуссар Ирыстоны паддзахадон университетмæ цæудзысты, æрмæст Хуссар æмæ Цæгат Ирыстоны скъолаты рауагъдонтæ нæ, фæлæ ма Уæрæсейы æппæт регионты рауагъдонтæ дæр», — банысан кодта Икъаты Зауыр.

Дзыллон информацийы фæрæзты минæвæртты зæрдæтæ барухс кодтой, журналистикæ-йы факультетмæ чи цæуы, сæ фидæны уыцы коллегæтæ, кæцытæ абон фыстой сæрибар те-мæйыл сочинени. Уыдоны се ‘ппæты дæр фæнды республикæйы дзыллон информацион фæрæзты кусын.

Абитуриенттæй иу — Беройты Кристинæ, бæллы информацион агентад «Рес»-ы бакусынмæ.

«Афтæ мæм кæсы, æмæ журналистикæ мæ царды хæс у. Университет фæуыны фæстæ мæхи уынын корреспондентæй, иууыл тынгдæр мæ фæнды «Рес»-мæ бахауын», — радзырдта фидæны журналист.

Фæсаууонмæ хайадмæ нырма дæр ист цæуынц документ-тæ, фæстæдæр уыдонæн дæр райдайдзысты бацæуæн фæлварæнтæ.