Раздæр адæм сæ чызджыты Цъунармæ чындзы æвæндонæй лæвæрттой. Цæмæн? Хъæу – рæсугъд, горæт – æввахс, адæм – хорз, йæ райдзастæй дæр зæрдæ райы! Хъæуы астæу – Сыгъдæр Мады Майрæмы Райгуырды Аргъуан! Аххосаг та уыд ахæм: æгас хъæуы иу суадоны йедтæмæ нæ уыд. Цæрджытæ-иу æм рæгъ-рæгъ слæууыдысты сæ ведрæтæ æмæ боцкæтимæ. Уыдон-та уыдысты фылдæрбæрцæй сылгоймæгтæ. Ахæм цард цы у?
Фæлæ ацы зын хабар рараст кодтой, хъæумæ бауагъдтой дон, æмæ ныртæккæ дон цæуы адæмæн комкоммæ сæ хæдзæрттæм. «Ныр нæм фылдæр чындзæхсæвтæ цæудзæн!» – хъазгæйæ, дзурынц бынæттон цæрджытæ. Тагъд та нæ хæдзæртты æрдзон газ дæр фæзындзæн!
Афтæ фæивта, Хетæгкаты Къостайы дæр-ма чи федта, уыцы рагон ирон хъæу, цыран æрвылаз цæуынц йæ райгуырæн бонтæ…
↑ Наверх
