Куыд зонæм афтæмæй УФ-йы президент В.В. Путин бадзырдмæ гæсгæ ацы аз 1-æм апрелæй Уæрæсейы фæфылдæр сты, сывæллæттæ цы бинонты ис уыдонæн социалон бафыстытæй. Не ‘мбæстæгты фылдæр æмбисæн уæрæсейаг æмбæстагдзинад кæй ис, уымæ гæсгæ цымыдис кæнынц цы категорийы сывæллæттæн цæудзысты фыст, уымæ. Уыцы фарстаты тыххæй нын лæмбынæгдæр радзырдтой Цæгат Ирыстоны пенсион фондæн нæ горæты цы филиал ис, уым.
Куыд нын загътой, афтæмæй не ‘мбæстæгтæй УФ-йы территорийыл фыст чи ис æмæ социалон бафыстытæ чи иста сывæллæттæн, уыдон нырæй фæстæмæ фæфылдæр уыдзысты алыгъуызон. Сывæллæттæн цæрынæн æнæмæнгхъæуæг продуктты минималон аргъ алы регионы дæр у хицæн æмæ хицæн. Уымæ гæсгæ иуæй иу регионты фæфылдæр уыдзысты 50, 70 æмæ кæм та 100 процентæй. Ам ма хъусдард цæудзæн бинонтæм мæйы мидæг цы æфтиæгтæ цæуы, уымæ дæр.
Уæрæсейы Федерацийы Президент уыцы ныстуан куы сарæзта адæммæ, уæдæй нырмæ алы регионы социалон хайады кусджытæ дæр бакуыстой уыцы уаггæвæрдыл. Уыцы куыстытæ цæуынц нырдæр æмæ куыддæр кæронмæ бахæццæ уой, афтæ сывæллæттæ цы бинонты ис, уыдон райсдзысты сæ фиддонтæ. Уыдонæй иу категори у 23 азы онг студенттæ кæмæн ис, стæй ма инвалид сывæллæттæ кæм ис, ахæм бинонтæ. Кæннод та райгуырдæй 1-аг къорды инвалид чи у. Ног уагæвæрды ис ахæм пункт дæр кæд æмæ ныййарджытæ ас сты, уæддæр сывæллоны æфтиæгтæм бафтдзæн 100 проценты. Фæлæ кæд бинонтæ сты ас кары, фæлæ куыстхъом, кæнæ кæной амалиуæджы куыст, уæд та сæм бафтдзæнис 50 проценты. Бинонтæм цы æфтиæгтæ хауы мæйы мидæг, уыдон цы регионы цæрынц уыцы фæцæрыны æппынкъаддæры бæрцæй къаддæр куы уой, афтæмæй сын гыццыл сывæллæттæ куы уа, уæд дæр сæм æмбæлы уæлæмхас социалон æххуыс. Ныййарджытæм афæдзы дæргъы кæд ницы æфтиаг цыд, уæд ацы уæлæмхас бафыст уыдзæн 100 процентæй. Æрмæст уæд каст цæудзæнис цæй тыххæй уыдысты æгуыст æмæ сæм æфтиаг цæмæннæ цыд, уымæ. Уый тыххæй бавдисын хъæудзæнис гæххæттытæ. Кæд æмæ уыдон уой адæймагæн йæхицæй аразгæ чи нæу, ома, цæй тыххæй нæ куыста уыцы аххосаг. Зæгъæм кæд бирæсывæллонджын бинонтæн ныййарджытæй сæ иу уыд сывæллæттæм кæсæг. Кæнæ иунæгæй сывæллон кæй хæссы, уымæ гæсгæ ныййарæг куыстхъом нæу. Сывæллоныл 3 азы цалынмæ нæ сæххæст, уæдмæ йæм йæ ныййарæг куы кæса, уæддæр. Сывæллоны райгуырды рæстæджы ныййарæг уыд студент (æрмæст ыл 23 азæй фылдæр хъуамæ ма цæуа, стæй фæсаууонмæ ахуыр дæр нымады нæ цæуы). Ныййарджытæй иу æрыздæхт æфсадæй æмæ уæдæй нырмæ æртæ мæй нæма рацыд. Ныййарджытæй сæ иу æртæ мæйæ фылдæр йæхицæн хос кодта. Æгуыст кæй у ныййарæг, уый тыххæй кæд регистрацигонд разына куыстæй ифтонггæнæн центры. Ныййарæг уыд ахст æмæ кæй ссæрибар, уымæй æртæ мæй нæма рацыд æмæ афтæ дарддæр.
Æппæт ацы ранымад аххосæгтæм гæсгæ ныййарджытæ кæд æмæ æгуыст уыдысты, уæд бафиддзысты ацы уæлæмхас социалон бафыстытæ. Уымæй дарддæр ма бинонтæ исбоны хицау куы уой, зæгъæм цалдæр фатеры сæм куы уа æмæ афтæмæй иу адæймагмæ 24 квадратон метрæй фылдæр куы хауа, уæд сæм уæлæмхас бафыст не ‘мбæлдзæн. Ацы ран нымад нæ цæудзæн социалон æххуысы хуызы бинонтæн цы фатер радтой, уый.
Æнæниздзинад хъахъхъæныны социалон хайады та куыд зæгъынц, афтæмæй уыцы инфоррмаци куыст фæуыдзæн майы мæйы кæрæттæм æмæ уæд июны мæйы райдиан фидын райдайдзысты, уыцы социалон бафыстытæ Уæрæсейы æмбæстæгтæн.
Уазæгты Марфа, газет «Хурзæрин»
↑ Наверх
