Куыд зонæм, афтæмæй Уæрæсейы Федераци æмæ Цæгат Ирыстон-Аланийы дæр интенсивонæй уагъд цæуы вакцинаци коронавирусы ныхмæ. Вакцинаци æрцыдысты, нæ республикæйы территорийыл цы 4-æм Æфсæддон базæ ис, уый службæгæнджытæ дæр. Куыд ма хъусын кодтам, афтæмæй нæ республикæмæ дæр æрластæуыд вакцинæ «Сутник V».
Республикæйы Æнæниздзинад хъахъхъæныны министрады сæйраг терапевт Санахъоты Тамарæ ацы бонты хуынд æрцыд Sputnik-ы пресс-центрмæ. Уый радзырдта, коронавирусы ныхмæ вакцинаци кæй аразынц не ‘мбæстæгтæ æмæ бонæй-бон сæ нымæц фылдæр кæй кæны. «Нæ республикæйы цæрджытæ дæр аразынц коронавирусы ныхмæ вакцинаци. Медицинон персонал бацæттæ кодта кабинеттæ, цæмæй, вакцинæ аразынмæ чи æрбацæуа, уыдон æппындæр мацы зындзинæдтыл сæмбæлой. Вакцинаци скæнын у барвæндонæй. Фыццаг рады вакцинæ сарæзтой медицинон уагдоны кусджытæ сæхæдæг, стæй уыцы процедурæ конд куы фæцис кусджыты ‘хсæн, уæд та иннæ цæрджыты райдыдтам хонын. Судзин аразыны размæ алы адæймаг дæр хъуамæ ауынаффæ кæна йæхи фадыгон дохтыримæ, дохтыр зонгæ у алы адæймаджы медицинон картæимæ дæр. Уымæ гæсгæ вакцинæ саразын гæнæн кæмæн ис, уымæн радтынц барлæвæрды гæххæтт. Коронавирусæй рынчын чи уыд æмæ чи схос кодта, уыцы рынчынтæн дæр арæзт цæуы вакцинæ, кæд æмæ рынчын куы уыд, уымæй 6 мæйы рацыд, уæд. Поликлиникæйы арæзт цæуынц анализтæ, кæд æмæ антителæтæ дæсæй фылдæр уой, уæд ахæм пациентæн нæма æмбæлы саразын прививкæ, фæлæ фондзы онг кæй титртæ æрхауой, уый аразын хъæудзæн æнæмæнгæй, цæмæй йыл дыккагæй ма бахæца ацы хæцгæ тæссаг низ. Хроникон низтæй рынчын чи сты, ома, диабет, онкологи æмæ æндæр ахæм низтæй, уыдонæн вакцинæ арæзт цæудзæн индивидуало-нæй», – радзырдта Санахъоты Тамарæ.
Уый ма куыд загъта, афтæмæй абоны онг прививкæ сарæзтой 129 адæймаджы. Антителæтæм та туг радтой 587 адæймаджы. Уыдонæй 153-йæн сбæрæг антителæтæ æмæ сæ нырма нæ хъæуы вакцинæ аразын. Куыд зонæм, афтæмæй вакцинæ арæзт цæуы дыууæ хайæ æмæ дыккаг компонентæй та судзин сарæзтой 13 адæймаджы. Уыдонæн дæр сæ нымæц алы бон дæр фæфылдæр вæййы. «Æхсæнады коллективон иммунитеты тыххæй нырма раджы у дзурын, уæд адæмæн сæ фылдæр хай хъуамæ æрцæуа басгææрст», – загъта сæйраг терапевт.
Уазæгты Марфа, газет «Хурзæрин»
↑ Наверх