Космонавтикæйы  рæзты цыбыр истори

Адæймаджы архайды космикон æмæ зæххон здæхтыты баиу кæныны идея у теоретикон космонавтикæйы бындурæвæрæг К.Циалковскийы. Ахуыргонд-иу  дзырдта, зæгъгæ, планетæ у зонды авдæн, фæлæ нæй гæнæн æнусты дæргъы авдæны цæрын. Уæд уый йæ разы æрæвæрдта альтернативæ, кæнæ Зæхх кæнæ Космос. Ахуыргонд фидарæй æууæндыд, адæм кæй фæивдзысты Зæххы уæлцъар, йæ океантæ, атмосферæ, зайæгойты æмæ сæхи дæр. Советон Цæдисы космикон программæты фæдыл практикон куыстытæ баст сты С.Королев æмæ М.Тихонравовы нæмттимæ. 1945 азы М.Тихонравов сорганизаци кодта специалистты къорд ракетон аппараты проект бакусыны фæдыл æмæ куы сцæттæ, уæд æй бавдыста И.Сталинмæ.

Космонавтикæйы триумф ссис 1961 азы 12-æм апрелы фыццаг адæймаг, Юри Гагарины космосмæ атахт. Советон Цæдис дæргъвæтин рæстæгмæ космосмæ тæхыны программæты фæдыл ссис дунейы раззагондæр бæстæ. 1960-1970 азты фыццаг хатт советон космонавттæ æвдисæн систы æнæ космикон науæй дæр æнтыстджынæй кусыны фадат кæй ис, уымæн. 1967 азы дыууæ æнæпилотон  спутникы «Космос-186» æмæ «Космос-188»-ы автоматонæй баиу уæвыны рæстæджы скъуыддзаг æрцыд егъаудæр зонадон-техникон проблемæ, кæцы фадат радта цыбыр рæстæгмæ фыццаг орбиталон станц саразынæн. Космикон тыхтæй пайда кæнын 1,5-2 хатты ахъаз кæны æфсæддон тыхты архайды эффективондзинад фæбæрзонддæр кæнынæн. 20-æм æнусы кæрон хæстон конфликттæ фенын кодтой, хæстон ныхмæлæуды хæслæвæрдтæ скъуыддзаг кæныны рæстæджы космосы нысаниуæг æппынæдзух кæй рæзы, уый. Æрмæстдæр космикон фæрæзтæй пайда кæнгæйæ, гæнæн ис территори бахъахъхъæнын кæцыфæнды агрессоры ракетон-ядерон бабырстытæй дæр.

Уæрæсейаг космикон зонад нæ лæууы иуран, размæ цæуы. Уæрæсейаг ахуыргæндтæ проекттæ аразынц 21-æм æнусы космикон системæтæн.

ФИДÆНЫ ИРОН КОСМОНАВТ

Цæгатирыстойнаг Ханайты Амиран суыдзæн дунеон космикон станцы экипажы æртæ уæнгæй сæ иу. “Роскосмос”-ы ныммыхуыргонд докладмæ гæсгæ корпораци «РКК Энергия»-йы космикон нау «Союз»-ы дунеон космикон станцмæ атахт плангонд у 2019 азы майы мæймæ. Развæлгъау бæрæггæнæнтæм гæсгæ атахт аххæсдзæн 8 мæймæ. Ханайты Амиран  радзырдта атахтмæ куыд цæттæ кæнынц, уый тыххæй. «Æз алы хатт дæр цымыдис кодтон астрономимæ, чысылæй фæстæмæ уарзтон стъалытæм кæсын, космикон тыгъдады тыххæй чингуытæ кæсын æмæ кинофильмтæм кæсын. Бæллыдтæн мæ цард ацы фадыгимæ сбæттын æмæ фæнд кодтон Бауманы номыл  Мæскуыйы паддзахадон техникон университеты ракетон-космикон факультетмæ бацæуын. Фæлæ, хъыгагæн, мæ бæллиц нæ сæххæст æмæ бацыдтæн ЦИПУ-йы физикон-математикон факультетмæ. Æмæ уый фæстæ базыдтон, дунеон космикон станцмæ атæхыны тыххæй  кандидаттæ кæй æвзарынц, уый тыххæй æмæ иу секунд дæр нал ахъуыды кодтон. Гагарины рæстæджы экспедицимæ ацæуын сæ бон уыд æрмæстдæр æфсæддон тæхджытæн, æмæ абон та космосмæ атæхын йæ бон у алкæмæндæр, сæйраг сты физикон æмæ психикон æнæниздзинады критеритæ рацæуын. Уый фæстæ хъæуы ахуыр кæнын астæуккаг нымадæй фондз азы, æниу адæймаг космосмæ атæхы дзæвгар фæстæдæр. Æз сдæн бархион, универ-ситеты фæстаг курс куы фæуд кодтон,  уæдæй фæстæмæ рацыд аст азы. Æппæт уыцы рæстæджы мах ахуыр кодтам космикон станц, атахты теори æмæ динамикæ. Æгæрыстæмæй нæ операторон хъуыддагыл дæр ахуыр кодтой, цæмæй нæ бон уа исын æмæ науы экипажæй роликтæ Зæхмæ æрвитын. Æмæ, кæй зæгъын æй хъæуы, æдзухон физикон цæттæдзинад: диетæтæ, тренировкæтæ. Иууыл вазыг-джындæр у медицинон басгæрст, лæмбынæг дæ фæрсынц исты дæ риссы уымæй, афтæмæй дæхи хатыс фæлтæрæнтæ кæуыл аразынц, ахæм чысыл сырды хуызæн. Кæй зæгъын æй хъæуы, æнкъарын цахæмдæр тасдзинад, фæлæ мæ цымыдисдзинад тыхджындæр у», — радзырдта ирон космонавт.

ТРАГИКОН МÆЛÆТ ÆЙ НÆ БАУАГЪТА КОСМОНАВТ СУÆВЫН

Уый уыд Хаситы Лев — æфсæддон тæхæг. Авиацион ахуыргæнæндон каст фæуыны фæстæ  службæ кодта æфсæддон авиацион хæйттæй сæ иуы. Гагарин космосмæ куы атахт, уæд бирæ æвзонг адæймæгты бафæндыд фыццаг космонавты бафæзмын æмæ куырдиæттæ фыстой сæрмагонд къамисмæ. Уыдон ‘хсæн уыд Хаситы Лев дæр. Бирæ рæстæджы йæхи цæттæ кодта æппæт тыхтæй космосмæ атæхынмæ, фæлæ 1965 азы йæ къорды æрцыд трагикон инцидент, кæцыйы фæстиуæгæн Хасийы фырт фæмард. Æрмæст йæ ныгæнæн боны базыдтой, Хаситы Лев космонавтты къорды кæй уыд, уый тыххæй, уыцы рæстæджы алцы дæр сусæггаг кæй уыд, уымæ гæсгæ. Ирон нæлгоймаг трагиконæй куынæ фæмард уыдаид, уæд гæнæн ис æмæ суыдаид фыццаг ирон космонавт.

ЙÆ НОМ ФЫСТ ÆРЦЫД КОСМОНАВТИКÆЙЫ ИСТОРИЙЫ

Фæлæ дунеон космонавтикæйы историйы ирон лæджы ном уæддæр баззад. Уый у Токаты Григори (Гогки)  XX-æм æнусы дыккаг æмбисы зынгæ ахуыргонд, авиа-конструктор, америкæйаг космикон агентад НАСА-йы раззагон специалист, космикон станцтæ «Меркурий» æмæ «Аполлон»-ы проектты бакуысты хайадисæг. Курдиат-джын ирон ахуыргонды ном зындгонд ссис йæ Райгуырæн бæстæйы нæ, фæлæ фæсарæнты. Цæгат Ирыстоны астæуккаг скъола каст фæуыны фæстæ бацыд Жуковскийы номыл Æфсæддон-уæлдæфон академимæ. Академи каст фæуыны фæстæ йæм бахатыдысты, цæмæй бакуыстаид академийы цур аэродинамикæйы лабораторийы. Йемæ куыстой ахæм зындгонд авиаконструктортæ, куыд С.Ильюшин, А.Микоян. 1945 азы Сталины рекомен-дацимæ гæсгæ Токаты Григори хаст æрцыд гермайнаг рейхы авиа æмæ ракетæ-арæзтады  трофейон документаци бæрæг кæныны фæдыл Берлины Паддзахадон къамисы скондмæ. Фæлæ Берияимæ фæбыцæу, тæссаг ын уыд æрцахсынæй æмæ цæмæй Лубянкæйы ахæстонмæ ма бахаудаид, уый тыххæй рахызт Берлины оккупацийы англисаг зонæмæ.

Ирон ахуыргонды курдиатæн саргъ кодтой Ныгуылæны. Английы Токаты Григори каст фæцис Импераг колледж, фæстæдæр та  авиацийы Кранфильды колледж. Уый хайад иста англисаг-францаг уæлзæлон хæдтæ-хæг «Конкорд»-ы бакусыны, англисаг ахуыргæндты къорды сконды куыста америкæйаг космикон программæйыл. 1972 азы америкæйаг астронавттæ Мæйыл сæвæрдтой Токаты Григорийы хуызист йе стыр лæггæдты тыххæй. Уый уыд зонæдты доктор, астронавтикæйы америкæйаг академийы æцæг уæнг.

1993 азы политикон репресситы амæт-тæгты реабилитацийы фæдыл къамис архивон документтæ лæмбынæг сахуыр кæныны фæстæ Токаты Григорийæ ист æрцыд Райгуырæн бæстæйыл гадзрахатæй рацæуыны тыххæй аххос. Ирон ахуыргонд амард Лондоны 2002 азы.

Æрмæг бацæттæ кодта Джиоты Екатеринæ

Наверх