Уæрæсейы Федерацийы Хъахъхъæнынады министрады бирæфункционалон æфсæддон госпиталь Хуссар Ирыстоны территорийыл йæ райтынгæй фæстæмæ æххуыс кæны коронавирусæй рынчын æмбæстæгтæн хос кæныны. Куыд ма хъусын кодтам, уымæ гæсгæ хайæдтæ ифтонг сты æнæмæнгхъæуæг медицинон нырыккон ифтонггæрзтæй.
Мобилон госпиталы къухдариуæггæнæг, медицинон службæйы дæлбулкъон Расул Муртазалиевы ныхæстæм гæсгæ зæгъæн ис, æмæ Хуссар Ирыстоны эпидемиологон уавæр хуыздæрæрдæм кæй ивы. Фæлæ уымæ нæ кæсгæйæ, госпиталы специалисттæ æрвылбон дæр нæ æнæниздзинад хъахъхъæныны уагдæтты кæнынц консультативон æххуыс.
Бузныджы ныхæстæ
Æнæзæгъгæ нæй, ацы госпиталы цы рынчынтæ хос кодтой æмæ кæнынц, уыдоны бузныджы ныхæсты тыххæй. Хуыгаты Гулизæ ацы инфекцион низы рогау хаста, дохтыры амындмæ гæсгæ хос кодта хæдзарон уавæрты. Зæронд гуырæн хæдзары исæн хайады радон æмбæлон медицинон басгæрст рацæуыны фæстæ йæ бахъуыд стационарон хос кæнын. Æмæ йæ уæрæсейаг дохтырты рекомендацимæ гæсгæ схуыссын кодтой æфсæддон госпиталы.
«Иннæ хосгæнæн уагдæтты ацы низимæ куыд тох цæуы, уыимæ æз зонгæ нæ дæн, фæлæ ацы госпиталы медперсонал сты хуыцауысконд адæм. Мæ дохтыр Никита Александры фырт æппынæдзух ис мæ уæлхъус, боны алы афон дæр цымыдис кæны, мæ æнæниздзинад куыд у, уымæ. Ацы госпиталы дохтыртæ рынчынтæн æрмæст медицинон æххуыс нæ кæнынц, фæлæ психологон æххуыс дæр. Уымæн æмæ бирæ æмбæстæгтæ, ацы низы тæфаг сæхимæ банкъаргæйæ, иухуызон нæ равдисынц сæхи – бирæтæ фæтæрсынц, ома ацы æнæхайыры низ мæлæтдзаг у æмæ дзы ирвæзæн нæй. Ахæмтимæ иттæг хорз кусынц, сабыр сæ кæнынц хъæлдзæг ныхæстæй», — дзырдта нын уый.
Гулизæйы ныхæстæм гæсгæ ацы дохтыртæн сæ лæмбынæг куыст, æххуыс æмæ лæггады тыххæй бирæ дзурæн æмæ бирæ дæнцæгтæ æрхæссæн ис. Госпиталæй цы æмбæстæгты афыссынц, уыдон сын бузныджы нысанæн фæстæмæ æрбарвитынц нæ национ хъæздыг къæбицæй хуынтæ. Уымæн æмæ зæрдиагæй ацаходынц нæ кадджын ирон хæбизджынтæ æмæ æндæр хæрзад хæринæгтæй.
Ахæм æппæлæн ныхасы бын нæ фæкодтой Дыгъуызты Иринæ, Хацырты Оля æмæ Уалыты Людмилæ дæр, зæгъгæ, нæ бæсты ацы урсхалатджын зæдтæн арфæ ракæнут газеты фæрстыл.
Госпиталы куысты тыххæй
Расул Муртазалиевы ныхæстæм гæсгæ сæ æрцыдæй фæстæмæ госпиталы специалисттæ сарæзтой мин æмæ æрдæгæй фылдæр ПЦР иртасæн куыстытæ æмæ сæнæниз кодтой сæдæ фæндзай адæймагæй фылдæры. Фæкъаддæр госпиталмæ рынчынты бахатыны нымæц, уый бæрæг у республикон рынчындоны дæр.
Фылдæр госпиталмæ цы рынчынтæ бахауынц, уыдон æрмæст ацы низы ахæсты нæ вæййынц, фæлæ йе ‘ндæвдадæй фæтыхсынц зæрдæйы низтæй, туджы æлхъывдад, йæ буары уæз егъау кæмæн у, сæкæр бæрзонд кæмæн у, ахæмтæ.
Ацы госпиталы дæр архайы «сырх зонæ», ис дзы исæн хайад, инфекцион æмæ терапевтон. Уæззау рынчынты æрвитынц инфекцион, иннæты та терапевтон хайадмæ. Исæн хайады уæвынад кæны лабораторон хайад, уым арæзт цæуынц æппæт анализтæ – иумиагклиникон æмæ биохимион. Госпиталы ис реанимацион хайад дæр, фæлæ уæззау рынчынты схуыссын кæнынц республикон бирæпрофилон медицинон центры реанимацион хайады.
Къæбулты Марина, газет «Хурзæрин»
↑ Наверх